SERENI CYLINDRICORUM LIBELLI DUO

16^o augusti VII^ae Indictionis 1534

Sereni Cylindricorum Liber I

<Diffinitiones>

<1> Si duorum circulorum aequalium et parallelorum semidiametri usque quaque paralleli existentes circumactae in circulorum planis circa permanens centrum ac circumducentes rectam lineam ipsarum extrema in eadem parte connectentem in idem rursus revolvantur, descripta a circumducta linea superficies cylindrica superficies appellatur, quae certe in infinitum augeri potest, recta linea ipsam describente in infinitum ducta.

<2> Cylindrus autem est figura solida comprehensa sub circulis et cylindrica superficie.

<3> Bases cylindri, circuli.

<4> Axis est recta linea acta per ipsorum centra.

<5> Latus cylindri est recta in cylindrica superficie inter basium periferias, quaeque circumacta cylindricam superficiem describit. Cylindrorum quidam recti sunt, quidam scaleni.

<6> Rectus cylindrus est, cuius axis ad basim perpendicularis est.

<7> Scalenus autem, cuius axis ad basim inclinatur.

<8> Similes cylindri sunt, quorum axes basium diametris proportionales sunt, ac minime vel aeque inclinati.

<9> Cum planum per axem cylindrum secat ad rectos angulos basi; moxque aliud planum non per axem sed plano primo rectum, secuerit cylindrum, ita ut planorum sectio ad latera cylindri terminetur, ipsa planorum sectio diameter est factae in cylindro sectionis.

<10> Recta vero, quae dictam diametrum bifariam et ad rectos dispescit angulos, secunda diametros dicetur eiusdem sectionis.

<11> Sectio autem ipsa ellipsis vocatur, quando diametri sunt inaequales.

<12> Centrum sectionis est punctum, in quo se diametri dispescunt.

<13> Similes sectiones sunt, quarum diametris respondentibus ad eandem rationem quotiescumque sectis, et a punctis divisionum structim eductis ad periferiam, eductae sunt sicut diametri.

<14> Similes sectiones¹ et aequales sunt, quarum diametri unus diameter alterius singulae singulis sunt aequales, et structim eductae a respondentibus diametris ad periferias ad eandem rationem secantes diametros ubicumque sunt invicem aequales.